मटिहानी (महोत्तरी), १३ भदौ । :

महोत्तरीको मटिहानी नगरपालिकाले शिक्षामा छोरीको पहुँच बढाउन र पढाइका लागि उत्प्रेरणा गराउन छात्रालाई साइकल प्रदान कार्यक्रमलाई निरन्तरता दिएको छ । माध्यमिक शिक्षा परीक्षा (एसइई) उतीर्ण गरेपछि माथिको अध्ययनमा हौसला थप्न यो कार्यक्रमलाई निरन्तरता दिइएको मटिहानी नगरपालिकाका प्रमुख हरिप्रसाद मण्डलको भनाइ छ ।

नगरपालिकाले बिहीबार विगत वर्षहरुजस्तै श्रीराम माध्यमिक विद्यालय मटिहानी–८ मा कक्षा ११ मा भर्ना भएका ५८ जना छात्रालाई साइकल प्रदान गरेको छ । आर्थिक वर्ष २०७७/०७८ देखि थालिएकोे यो कार्यक्रमले बर्सेनि कक्षा ११ मा भर्ना हुने र पढाइलाई निरन्तरता दिने छात्राको सङ्ख्यामा वृद्धि भइरहेको नगरप्रमुख मण्डलले बताउनुभयो ।

“शैक्षिक सत्र २०७७ मा यस विद्यालयमा कक्षा ११ मा भर्ना हुने ३५ छात्रामात्र थिए , यो सङ्ख्या बर्सेनि बढ्दैछ” मण्डल भन्नुहुन्छ, “हाम्रो उद्देश्य यहाँका छोरीहरु उच्च शिक्षासम्म जोडिउन् भन्ने हो, जुन उद्देश्य प्राप्त भइरहेको देखिदो छ ।” यद्यपि यसपालि अहिलेसम्म कक्षा ११ मा छात्रा भर्ना गत वर्षभन्दा कम छ । गतवर्ष २०८१ को शैक्षिक सत्रमा ७७ जना छात्रा थिए । यता श्रीराम माविका प्रधानाध्यापक श्रीषकुमार मिश्रले एसइईको मौका परीक्षाको नतिजा प्रकाशित भएपछि छात्रा भर्नाको सङ्ख्या बढ्ने स्पष्ट पार्नुभयो ।

साइकलले विद्यालय आउजाउमा निकै सहज हुने साइकल पाएका छात्राको भनाइ छ । “साइकलले हामीलाई निकै सजिलो बनाउने छ, अब घरको काममा आमाबुबालाई सघाएर पनि समयमै विद्यालय आइपुग्ने छौं” बिहीबार नयाँ साइकल पाउनु भएकी कक्षा ११ की छात्रा अंशु महतो भन्नुहुन्छ, “यसले हामीलाई पढाइलाई निरन्तरता दिन हौसला दिएको छ ।” अंशुजस्तै नयाँ साइकल पाउनु भएकी कक्षा ११ कै छात्रा सरस्वती कुशवाहा र अञ्जली साहले पनि साइकल आफूहरुका लागि नियमित विद्यालय आउजाउ गर्न वरदान बन्ने बताउनु भएको छ ।

छात्रालाई दिइने साइकल एउटा बस्तुभन्दा शैक्षिक जागरणको दियो बन्दै आएको साइकल वितरण समारोहमा सहभागी जिल्लाका प्रमुख जिल्ला अधिकारी नारायणप्रसाद रिसालको धारणा छ । यसैगरी मटिहानीस्थित याज्ञवल्क्य लक्ष्मीनारायण विद्यापिठ (संस्कृत क्याम्पस) का प्राचार्य हेमनारायण लाल कर्णले छात्रालाई साइकल प्रदान गरिदै आइएपछि अभिभावकहरुमा पनि छोरी शिक्षाबारे सकारात्मक धारणा बढेको बताउनुभयो ।

उच्च शिक्षामा छोरीको पहुँच बढाउन कक्षा–११ का छात्रालाई साधन र शैक्षिक सामग्रीमा सबल बनाइन साइकल उपलब्ध गराइन थालिएको मटिहानीका नगरप्रमुख मण्डलको भनाइ छ । विगतमा विद्यालय पढ्न आउने छोरीको सङ्ख्या निकै तल देखिएपछि आकर्षणका लागि यो कार्यक्रम थालिएको मण्डलले स्पष्ट पार्नुभयो ।

मटिहानी नगरक्षेत्रका माध्यमिक विद्यालय (कक्षा–११, १२ पठनपाठन हुँदै आएका) मा कक्षा ११ मा नाउँ लेखाएर नियमित आउजाउ गरीरहेका जुनसुकै ठाउँमा स्थायी बसोबास भएका छात्रालाई नगरपालिकाले यो सुविधा दिदै आएको छ । कक्षा ११, १२ को पठनपाठन हुने श्रीराम मावि मटिहानी नगरक्षेत्रका पाँच माध्यमिक विद्यालयमध्ये एकमात्र हो । यहाँ मटिहानीबाहेक जलेश्वर नगरपालिका , धनुषाको तुलसियाही , मुखियापट्टी मुसर्नियाँ र केही मित्रराष्ट्र भारतको मटिहानीसँगै जोडिएको मधवापुरका समेत छात्रा पढ्ने गरेका विद्यालय प्रशासनले जनाएको छ ।

छोरीहरुले साइकल पाएपछि उनीहरुको पढाइप्रति अभिभावकमा पनि सकारात्मक चासो बढेको छ । पछिल्ला छ वर्षयताको साइकल कार्यक्रमले छोरीहरु विद्यालय जानमात्र नभइ घरमै पनि पढाइमा मेहनत गर्न लागेका मटिहानी–८ का युवा इसराफूल अन्सारी बताउनुहुन्छ ।